Labarai
Sojojin Najeriya sun fara horar da fararen hula a Kaduna don yaƙar ƴan fashin daji
A yunƙurin ta na daƙile ayyukan ‘yan fashin daji a kudancin Kaduna, rundunar Operation Safe Heaven ta sojojin Najeriya ta yaye matasa 98 da bai wa horo kan tattara bayanan sirri da leƙen asiri.
Yayin bikin yayewar da ya gudana a Hedikwatar Runduna ta 7 a Kafanchan a yau Laraba, matasan sun kammala horon cikin nishaɗi, a cewar sanarwar da Manjo Ishaku Takwa ya fitar.
Da yake yi wa matasan jawabi, Kwamandan Rundunar Operation Safe Heaven Manjo Janar Ibrahim Ali ya neme su da su “guji ɓangaranci kuma su gudanar da ayyukansu ba tare da tsoro ko alfarma ba”.
Janar ɗin ya gargaɗe su da kar su bari ‘yan siyasa su yi amfani da su wajen dabar siyasa.
Ya ce an zaɓo matasan ne daga ƙabilu bakwai mafiya girma a ƙananan hukumomin Kafanchan da Kauru da Kaura da Jema’a.
