Labarai
Gwamnatin Jihar Kebbi Ta Gyara Cibiyoyin Kiwon Lafiya 140
Gwamnatin jihar Kebbi ta ce ta gyara cibiyoyin kiwon lafiya a matakin farko (PHCs) guda 140 yayin da ake ci gaba da aikin wasu 36 a halin yanzu.
Gwamna Atiku Bagudu ya bayyana haka a lokacin da ya karbi bakuncin gidauniyar Chigari da sauran kungiyoyi masu zaman kansu a gidan gwamnati da ke Birnin Kebbi, babban birnin jihar.
Kamfanin dillancin labarai na kasa (NAN) ya ruwaito cewa tawagar ta hada da wakilai daga hukumar lafiya ta duniya (WHO) da gidauniyar Solina da kuma gidauniyar Sultan.
Gwamnan ya samu wakilcin Alhaji Babale Umar-Yauri, Sakataren Gwamnatin Jihar.
Ya ce: “A kan ci gaban ababen more rayuwa, burinmu shi ne a samu aqalla cibiyar kiwon lafiya a matakin farko a kowace unguwanni 225 na siyasa a jihar.
“Don haka, za mu samu kusan 170 amma kafin karshen wannan gwamnati, duk sauran wadanda suka rage za a gyara su da kayan aiki.
“A bangaren ma’aikata, mun ba da izinin daukar ma’aikatan lafiya 850 domin cike gibin da ke da shi.
“A kan ci gaban al’umma, gwamnatin jihar tare da haɗin gwiwar USAID, sun kafa tsarin inshorar zamantakewa na jihar.”
Bagudu ya ce, al’amuran rigakafin sun nuna cewa jihar Kebbi ta samu kashi 55 cikin 100 na allurar rigakafin, inda ya tabbatar da cewa kafin karshen wannan gwamnati, gwamnati na shirin daukar kashi casa’in cikin dari.
A cewarsa, gwamnati na iya bakin kokarinta wajen inganta harkokin kiwon lafiya a fadin jihar domin amfanin daukacin mazauna jihar Kebbi.
Ya tunatar da cewa gwamnatin jihar ta kaddamar da kiwon lafiya a matakin farko a karkashin rufin asiri daya kuma sakamakon da jihar da kananan hukumomi suka samu ya nuna cewa kashi 82 cikin dari sun samu nasara.
(NAN)
