Labarai
Mutane Hudu Ne Suka Mutu A Ginin Da Ya Rushe — Hukumar NEMA
Hukumar ba da agajin gaggawa ta kasa NEMA a ranar Juma’ar nan ta tabbatar da cewa mutane hudu ne suka mutu yayin da aka ceto mutum daya a cikin baraguzan ginin da ya rufta a titin Oye Sonuga, Palm Avenue, a Mushin, da ke Legas.
Daily Post ta ruwaito cewa, Ko’odinetan NEMA shiyyar Kudu Maso Yamma, Mista Ibrahim Farinloye ne ya bayyana haka ga Kamfanin Dillancin Labaran Najeriya (NAN) a wata tattaunawa ta wayar tarho.
Ya ce maza biyu da mata biyu sun mutu, yayin da aka ceto mutum daya a baraguzan ginin.
Tun da farko dai gwamnatin jihar Legas ta kuma ce za ta binciki musabbabin rugujewar ginin.
Kwamishinan tsare-tsare na jiki da raya birane, Mista Omotayo Bamgbose-Martins, yayin da ya ziyarci wurin ginin bene mai hawa uku, ya ba da umarnin a rusa ginin nan take saboda dalilai na tsaro da kuma dakile kara rugujewar wani sashi na ginin.
Ya kuma umurci hukumar kula da gine-gine ta jihar Legas (LASBCA) da dakin gwaje-gwajen kayayyaki na jihar Legas da su bankado musabbabin faduwar ginin.
