Labarai
Rashin Tafinta: Kotu ta sake ɗage shari’ar Frank Geng Qwarong
Babbar kotun jihar Kano ƙarƙashin jagorancin mai shari’a Sanusi Ado Ma’aji ta sake ɗage ci gaba da sauraron shari’ar Mista Frank Geng Qwarong, da ake zargin da hallaka Ummukhulsul Sani Buhari da aka fi sani da Ummita.
Kotun ta ɗage sauraron shari’ar ne domin samo wanda zai riƙa yi wa Mista Frank Geng, tafinta Daga harshe turanci zuwa sinanci.
Freedom Radio ta ruwaito cewa, yayin zaman kotun na yau, Lauyan gwamnati kuma kwamishinan shari’a Musa Abdullahi Lawal da masu dafa masa sun halarci zaman kotun.
Sai dai bayan da kotun ta zauna ne lauyan wanda ake tuhuma Barista Danazumi Abdullahi, ya buƙaci kotun da ta samar da wanda zai yi wa wanda yake karewa mutumin da zai riƙa yi masa tafinta zuwa harshensa na Sinanci.
Bayan gabatar da roƙon ne kuma kotu ta amince tare da sanya ranar 27 ga wannan wata da muke ciki na Oktoba domin ci gaba da shari’ar.
