Labarai
Kotu ta umarci gwamnatin tarayya ta biya Nnamdi Kanu diyyar miliyan 500
Babbar kotun tarraya da ke Umuahia babban birnin jihar Abia, ta umarci gwamnatin tarayya ta biya jagoran ƴan aware Biafara Nnamdi Kanu diyya miliyan ɗari biyar.
Alƙalin kotun mai shari’a Evelyn Anyadike ce ta bada umarnin ta cikin hukuncin da ta yanke a zaman kotun na yau Laraba a matsayin hukuncin ƙarar da Nnamdi Kanu ya shigar yana zargin gwamnatin tarayya da tilasta ɗauko shi daga ƙasar Kenya zuwa Najeriya a watan Yunin bara.
Ƙafar BBC ta ruwaito cewa tun a watan Maris ɗin da ya gabata ne lauyoyin Kanu suka shigar da ƙarar suna masu da’awar cewa matakin na gwamnatin tarayya na dawo da shi ba tare da yardarsa ba dai-dai yake da keta masa ƴanci.
Haka kuma ta ruwaito cewa, Kawo lokacin da labarin ya fita babu wani martani daga gwamnatin tarayya a hukumance dangane da hukuncin.
