Labarai
Jam’iyyar APC Ta Dakatar Da Wani Shugaban Jam’iyyar A Jihar Zamfara
Jam’iyyar APC reshen jihar Zamfara ta dakatar da shugaban jam’iyyar na karamar hukumar Bukkuyum a jihar, Shehu Buda-Nasarawa, bisa zargin cin zarafin jam’iyyar.
Shugabannin jam’iyyar a jihar sun kuma amince da nadin Tafa Nasarawa a matsayin sabon shugaban jam’iyyar APC na riko a karamar hukumar.
Jaridar DailyNigerian ta rawaito cewa Hakan na kunshe ne cikin wata sanarwa da sakataren yada labaran jam’iyyar APC na jihar, Yusuf Idris ya fitar a Gusau ranar Asabar.
Sanarwar ta ci gaba da cewa: “Don sanar da jama’a an dakatar da shugaban jam’iyyar APC na karamar hukumar Bukkuyum, Shehu-Buda Nasarawa.
“Kwamitin zartaswar jam’iyyar na jiha karkashin jagorancin Alhaji Tukur Danfulani ya amince da nadin Alhaji Tafa Nasarawa a matsayin shugaban riko na jam’iyyar APC na yankin.
“Nadin ya fara aiki nan take, kuma an umurci tsohon shugaban da ya mika duk kadarorin jam’iyyar a hannun shugaban riko har sai an kammala bincike a kansa.
