Labarai
Wasu ‘Yan Bindiga Sun Yi Garkuwa Da Wasu Mutane A Katsina
Wasu ‘yan bindiga a kauyukan Batsari da Funtua a jihar Katsina sun yi garkuwa da mutane kusan 46 a karshen mako.
Wata majiya ta shaida wa Jaridar DAILY POST cewa a kauyen Karare da ke karamar hukumar Batsari a ranar Juma’a, an kashe mutum daya, yayin da aka yi garkuwa da mutane 28.
Majiyar ta bayyana cewa ‘yan bindigar sun kai farmaki kauyen ne da safe inda suka tafi da wadanda lamarin ya rutsa da su, ciki har da mata da kananan yara kimanin 40 akan babura.
A cewar majiyar, an yi garkuwa da daliban kauyen Kokiya da ke kan hanyar zuwa makarantar sakandare ta gwamnati dake Karare.
Ya kara da cewa, ‘yan bindigar sun fito ne daga yankin kudancin kauyen inda suka fara harbe-harbe, lamarin da ya yi sanadin mutuwar mutum daya.
Majiyar ta ce sun yi awon gaba da mutane 28 da suka hada da dalibai, amma daga baya sun sako hudu daga cikinsu, inda suka jaddada cewa wadanda aka sako sun hada da Malam Ladan daya da yara uku a yayin da suka aike musu da sakon cewa ba za su karbi tsofaffin kudin Naira ba.
A cewarsa, wani mutum daya ya tsere, yayin da a halin yanzu mutane 23 ke tare da ‘yan bindigar kuma babu wata bukatar kudin fansa da masu garkuwan suka yi.
