Labarai
Gwamnatin Tarayya Ta Kashe Biliyan Biyar A Harkokin ‘Yan Sanda Cikin Shekaru Uku
Gwamnatin tarayya ta ce ta kashe Naira biliyan 5 wajen gyaran ofisoshin ‘yan sanda da barikoki a sassan kasar nan da dama tsakanin shekarar 2019 zuwa 2022.
Har ila yau, ta bayyana cewa, rundunar ‘yan sandan Nijeriya ta inganta kayayyakin aiki a wasu cibiyoyin horaswa da suka hada da gine-gine da samar da asibitoci da cibiyoyin lafiya.
Ministan harkokin ‘yan sanda, Maigari Dingyadi ne ya bayyana hakan a yayin taron manema labarai na ‘PMB Administration Scorecard Series (2015-2023)’ wanda ma’aikatar yada labarai da al’adu ta tarayya ta shirya.
Dingyadi ya lissafa jihohin da aka gyara barikin kamar Kebbi, Edo, Borno, Yobe, Gombe, Bauchi, Plateau, Abia, Bayelsa, Nasarawa, Niger, Sokoto, Ogun, Lagos da FCT.
Ya shaida wa manema labarai cewa gwamnati ta kuma baiwa rundunar birnin tarayya kayan aiki a kan Naira biliyan 1.3, ta gyara kwalejin binciken ‘yan sanda da ke Enugu a kan Naira biliyan 1.2 da kuma kafa cibiyar ‘yan sanda ta intanet da aka kafa.
Ya ce an gudanar da ayyukan ne ta hanyar shiga tsakani da asusun tallafawa ‘yan sandan Najeriya.
Dingyadi ya kara da cewa an samu gagarumin ci gaba a bitar manhajar horarwa, domin cibiyoyin horas da ‘yan sandan Najeriya su yi daidai da yanayin aikin ‘yan sanda na zamani a kasar.
A halin da ake ciki, shugaban kasa Muhammadu Buhari ya sake sabunta alkawarin gwamnatinsa na inganta jin dadin jami’an rundunar ‘yan sandan Najeriya da mazajensu.
Shugaban ya bayyana haka ne a Abuja ranar Alhamis lokacin da ya karbi rahoton da aka tantance na shekarar 2021 da kuma kasafin kudin 2023 na hukumar ‘yan sanda (PSC).
Da take gabatar da rahoton da kasafin kudin 2023 ga shugaban kasa, mukaddashin shugaban hukumar ta PSC, Mai shari’a Clara Bata Ogunbiyi, JSC (Mai Ritaya), ta koka da yadda rashin isassun kudade na ci gaba da kawo cikas ga ayyukanta.
Ta bukaci da a sanya kasafin kudin hukumar a cikin cajin layin farko na kasafin kasafi.
Yayin da yake tabbatar da cewa za a yi la’akari da buƙatun, shugaban ya ce raguwar albarkatun da ke tasowa daga faduwar farashin ɗanyen mai da kuma samar da albarkatun cikin gida ya haifar da babban ƙalubale da gwamnati ta yi fama da shi.
