Tsaro
Bauchi: Rundunar Yan Sanda Ta Sanya Dokar Takaita Zirga-zirgar Ababen Hawa
Kasa da sa’o’i 24 a gudanar da zabukan gwamnoni da na ‘yan majalisu a ranar Asabar, rundunar ‘yan sandan jihar Bauchi a ranar Juma’a ta takaita zirga-zirgar jama’a da ababen hawa ba tare da izini ba a yayin gudanar da zaben, duk da cewa ta hana wasu muhimman mutane/’yan siyasa zuwa rumfunansu na zabe da masu basu tsaro.
Umurnin dokar takaita zirga-zirgar na kunshe ne a cikin wata sanarwa da jami’in hulda da jama’a na rundunar ‘yan sandan jihar, Ahmed Mohammed Wakil, ya sanyawa hannu kuma ya mika wa DAILY POST.
Ya kara da cewa dokar za ta fara aiki ne daga tsakar daren Juma’a zuwa karfe 06:00 na yammacin ranar Asabar, 18 ga watan Maris, 2023.
A cewar sa, “Matakin da aka dauka shi ne tabbatar da zaman lafiyar jama’a da kare lafiyar masu zabe tare da taimaka wa jami’an tsaro da aikin ‘yan sanda mai inganci da kuma dakile miyagu daga hargitsa harkokin zabe.
SP Wakil, ya bayyana cewa, bisa ga hakan, rundunar ta sanya dokar hana zirga-zirgar ababen hawa a fadin jihar ba tare da izini ba a kan tituna da sauran hanyoyin sufuri tsakanin tsakar daren Juma’a zuwa 06:00 na yamma ranar Asabar.
Duk da haka, ya kara da cewa dokar takaitawa ba zata shafi muhimman ayyuka ba; Ma’aikatan Hukumar Zabe Mai Zaman Kanta ta Kasa (INEC), da motar daukar marasa lafiya, ‘yan kwana-kwana, ‘Yan Jaridu da kuma masu sa ido kan zaben da suka dace da tantancewa.
“Masu taimakawa wajen bada tsaro da masu rakiya na VIP; Haka kuma an hana wasu muhimman mutane da ‘yan siyasa (VIPs) zuwa rumfar zabe da masu basu tsaro a ranar zabe,” in ji PPRO.
Daga nan sai ya bukaci jama’a da su tuntubi ‘yan sanda, kungiyar hadin gwiwa da ke sa ido kan zaben da dakin kula da ayyuka ta hanyar ‘NPF Rescue Me App’ da ake samu a wayoyin Android da IOS, ko kuma ta hanyar NPF Rescue Me Emergency Toll Free Line akan wadannan lambobi 08031230631, 08151849417 ko 09053872273 don bayar da rahoton mutanen da ake tuhuma, ayyuka ko neman martanin tsaro.
