Featured
Ma’aikatan Jami’a za su fara zanga-zanga a gobe Litinin
Biyo bayan kasa cimma matsaya tsakanin ministan ilimi da na kwadago da kwamitin hadaka na kungiyoyin ma’aikatan jami’a, kungiyoyin biyu sun umarci mambobinsu su shirya zanga-zanga a fadin kasarnan.
Zanga zangar, acewar sanarwar da kungiyoyin suka rabawa shugabanninsu na shiyoyi da manema labarai za ta fara ne daga gobe Litinin 8 ga watan Yuli a fadin jihohin Najeriya ciki har da Abuja.
Sanarwar wacce ke dauke da sa hannun Sakatare janar na kungiyar NASU da na SSANU, Prince Peters Adeyemi da Comrade Mohammed H Ibrahim ta ce “Kwamitin hadin gwiwa na kungiyoyin NASU da SSANU ya gana a ranar Alhamis 4 ga watan Yuli na 2024 don daukar mataki kan rike albashin watanni 4 na mambobinmu”.
” Haka kuma kwamitin ya amsa gayyatar karamin ministan ilimi da sauran manyan jami’an gwamnati, sai dai tattaunawar bata nuna cewa za a biya albashin na watanni 4 ba da kuma sauraron kokenmu”.
Haka kuma kungiyar ta koka kan rashin ganawa da karamar minisatar kwadago kan batun.
A don haka kungiyar ta umarci mambobinta da su hada kansu a ranar Litinin tare da gudanar da zanga-zanga a ranar Talata.
