Featured
AFCON 2023: Gwamnatin Tarayya Ta Baiwa Ƴan Wasan Super Eagles Gidajen Da Ta Yi Musu Alƙawari
Gwamnatin Tarayya ta cika alkawarin gidaje da Shugaba Bola Ahmed Tinubu ya ɗauka ga ’yan wasan Super Eagles bayan samun matsayi na biyu a gasar cin kofin nahiyar Afirka (AFCON 2023) da aka gudanar a Côte d’Ivoire a shekarar 2024. ’Yan wasan sun karɓi takardun shaidar filayen ƙasa da gidaje, lamarin da ya sanya farin ciki ya bayyana a fuskokinsu.
Hukumar Kwallon Ƙafa ta Najeriya (NFF) ta tabbatar da cewa an miƙa wa ’yan wasan takardun a sansanin su da ke Fez, ƙasar Morocco, ranar Litinin. Super Eagles dai sun sha kashi a wasan ƙarshe da ci 2-1 a hannun ƙasar mai masaukin baki, amma duk da haka gwamnati ta yaba da ƙoƙarinsu ta hanyar wannan gagarumin kyauta.
A baya dai Shugaba Tinubu ya karrama dukkan ’yan wasan da lambar girmamawa ta Member of the Order of the Niger (MON), tare da ba kowane ɗan wasa fili a Abuja da kuma gida. Haka kuma, NFF ta ƙara musu ƙwarin gwiwa ta hanyar ba ’yan wasa da jami’an tawagar agogon hannu na musamman Bay Ice x NFF, yayin da Super Eagles ke shirin fara wasanninsu na AFCON 2025 da Tanzania, kafin su kara da Tunisia da Uganda a wasannin rukuni.
