Featured
Zan Bai Wa Ƴan Wasan Super Eagles Dala $500,000 Duk Da Rasin Nasarar Da Suka Yi – Abdussamad BUA
Fitaccen ɗan kasuwa, AbdulSamad Rabiu, ya yaba wa ƙungiyar ƙwallon ƙafa ta Najeriya, Super Eagles, kan jajircewa da nuna ƙwazo a wasanninsu, duk da rashin samun nasarar da suka yi a ranar 14 ga Janairu, 2026. Ya ce ’yan wasan sun nuna jarumtaka, haɗin kai da ƙaunar ƙasa, abin da ya sa suka sa ’yan Najeriya alfahari.
Rabiu ya bayyana cewa ko da yake ba wannan sakamako ake fata ba, amma irin ƙoƙarin da Super Eagles suka yi a fili ya fi muhimmanci. A cewarsa, ruhin fafutuka, jajircewa da haɗin kai da ’yan wasan suka nuna su ne ginshiƙan nasara na gaskiya, kuma abin alfahari ne ga ƙasa.
A matsayin girmamawa da ƙarfafa gwiwa, AbdulSamad Rabiu ya sanar da cika alkawarin da ya ɗauka na ba da tallafin dala $500,000 ga ƙungiyar. Ya ce wannan kyauta na nuna godiya ne ga ƙoƙari, sadaukarwa da farin cikin da Super Eagles suka kawo wa Najeriya, tare da tabbatar musu cewa ƙasa na tare da su a nasarorin da ke gaba.
