Kasuwanci
Hukumar CPC A Jigawa Ta Cafke Wani Dan Kasuwa Da Kayan Iri Na Jabu
Hukumar kare hakkin mai siye a jihar Jigawa ta yi holen wani wani dan kasuwa da ta kama dauke da gurbataccen irin Kantu buhu 3.
Shugaban hukumar Alhaji Farouq Abdallah ne ya bayyana hakan yayin holen mutumin gaban manema labarai a Dutse babban birnin jihar a Asabar din nan.
Alhaji Abdallah ya ce sun kama mutumin ne a Kasuwar Kumsa dake karamar hukumar Guri a jihar, yayin da suka fita wani rangadi.
A cewar shugaban hukumar mutumin yana hada irin Kantun ne da kasa domin ya kara nauyi, wanda hakan zai bashi damar cutar jama’a kudi masu yawa wajen siyar musu da shi.
Ya bayar da tabbacin cewa zasu ci gaba da farmakar duk wani bata gari a fadin kasuwannin jihar, domin tabbatar da cewa ba a samu yan kasuwan dake ha’inci a cikin harkokin sana’o’in su.
