Labarai
Harin Jirgin NAF Ya Yi Sanadin Rayukan Mutane Uku Har Da Mai Ciki A Kaduna
Rahotanni sun bayyana cewa, wani harin da sojojin saman Najeriya suka kai a kauyen Sabon Gida da ke gundumar Fatika a karamar hukumar Giwa na jihar Kaduna, sun kashe wata mata mai juna biyu da wasu matasa biyu.
An ce jirgin saman yakin ya auka wa wasu ‘yan bindiga a wani daji da ke kusa da su da suka shiga kauyen.
Jaridar Daily trust ta rawaito cewa lamarin ya faru ne a ranar Lahadi da misalin karfe 5 na yamma.
An ruwaito cewa wadanda suka mutu ‘yan gida daya ne kuma wasu mutanen kauyen kimanin biyar sun samu raunuka.
Wani shugaban al’umma Hamisu Kurau ya tabbatar wa majiyar dimokuradiyya faruwar lamarin ta wayar tarho.
“An samu labarin jirgin ne bayan wasu ‘yan bindiga biyu da suka gudu zuwa kauyen. An ce ba a kai harin kan su da kankarba, amma kuma ya kashe matar mai ciki mai suna Furaira da wasu matasa biyu a gidan,” inji shi.
Ya ce mijin marigayiyar, Bala, da mahaifin ‘ya’yan biyu, Muntari, ‘yan’uwa ne.
Da aka tuntubi jami’in hulda da jama’a na ‘yan sanda (PPRO) a jihar, DSP Mohammed Jalige, ya ki cewa komai amma ya umurci wakilin majiyar ta mu da ya yi magana da hukumar sojin sama.
Kwamishinan tsaro na cikin gida da harkokin cikin gida na jihar Samuel Aruwan bai amsa kiran da aka yi masa ba kuma har yanzu bai amsa sakon wayar da aka aike masa kan batun ba, har zuwa lokacin hada wannan rahoto.
