Labarai
KAROTA za ta baza jami’ai 1,000 domin yin aiki ranar bikin rantsuwa
Hukumar kula da zirga-zirgar ababen hawa ta jihar Kano KAROTA ta ce, ta ware jami’anta guda 1,000 da za su kula da zirga-zirga ababen hawa a ranar bikin rantsuwar sabon gwamna.
Mai riƙon shugabancin hukumar kuma Daraktanta na Mulki Alhaji Abdullahi Yahuza, ne ya bayyana hakan ta cikin wata sanarwa da mai magana da yawun hukumar Nabilusi Abubakar Kofar Nai’sa ya fitar a daren yau Asabar.
Ya ce, an ware jami’an KAROTA ne domin kula da kaiwa da kawowar ababen hawa.
Ya kuma ce, “Za a rufe wasu daga cikin titinan da suka shafi kewayen filin da za a gudanar da taron”.
Alhaji Abdullahi Yahuza, ya ja hankalin jami’an da su gudanar da ayyukansu cikin nutsuwa tare da nuna ƙwarewar aiki
Haka kuma, ya roƙi al’umma da su bai wa jami’an hukumar haɗin kai tare da bin dokokin da aka shinfida kafin, yayin da kuma bayan Kammala taron bikin rantsuwar.
