Labarai
Zaben 2023: Wani Shaida Ya Fallasa Yadda ‘Yan Sanda Suka Gudarwa ‘Yan Daba
Wani shaida, Festus Abiodun Inioluwa, a ranar Juma’a, ya bayar da shaida a kotun sauraron kararrakin zaben gwamnan jihar Ogun da ke zaune a Abeokuta.
Shaidar ya bayyana cewa wasu jami’an ‘yan sanda da ke sanya ido a rumfunan zabe sun gudu ne a lokacin da ‘yan bangar siyasa suka mamaye sashin inda suka kawo cikas wajen gudanar da zaben a ranar 18 ga watan Maris.
Shaidan ya bayar da shaida a cikin karar da Ladi Adebutu, dan takarar gwamna a jam’iyyar PDP ya shigar a kan Gwamna Dapo Abiodun na jam’iyyar APC.
DAILY POST ta rahoto cewa lauyan Adebutu, Gordy Uche, ya kira shaidu sama da 80, ciki har da ma’aikatan wucin gadi na INEC guda biyu tun bayan bude karar sa a makonnin da suka gabata.
Shaidu hudu da suka bayyana a gaban kotun a ranar Juma’a, sun hada da Festus Abiodun Inioluwa, Balogun Oladipo, Gbenga Mustapha da Emmanuel Olugbile.
Dr Remi Olatubora mai wakiltar INEC, Farfesa Taiwo Osipitan (SAN) wanda ya fito takarar Gwamna Abiodun da Tayo Oyetibo (SAN) wanda ya wakilci APC ne suka yi musu tambayoyi.
A yayin amsa tambayoyi, wakilin PDP, Inioluwa, ya shaida wa kotun cewa, ‘yan bangar siyasa ne suka hargitsa zaben da aka yi a rumfar zabe ta 12, mazaba ta 6 dake karamar hukumar Sagamu.
Ya ce jami’an ‘yan sanda da sauran jami’an tsaro da ke kula da sashen zaben sun arce a lokacin da ake tsaka da atisayen.
Da yake amsa tambaya kan ko ya kai rahoto ga jami’an ‘yan sanda da ake zargin ‘yan bangar siyasa sun haifar wa jami’an tsaro tarzoma, shaidan ya ce: “Ban kai rahoto ba. Jami’an ‘yan sanda suna nan a kasa, amma sun arce a lokacin da ‘yan bangar siyasa suka kutsa kai cikin runfunan zabe, suka kawo cikas wajen gudanar da atisayen.”
Inioluwa ya kuma amince da jam’iyyarsa cewa jimillar masu kada kuri’a 49,066 ne aka yi watsi da su a zaben gwamnan jihar da aka yi ranar 18 ga watan Maris.
A nasa bangaren, Oladipo, wanda shugaban matasan PDP ne a Sagamu, ya bayyana cewa an kai hari kusan rumfunan zabe 99 a fadin jihar Ogun. Wannan ne ya sa PDP ta garzaya kotu.
Gbenga, wani shaida daga karamar hukumar Ogun Waterside, ya ce: “Ba a rubuta sakamako ko daya daga cikin jam’iyyun ba. ‘Yan barandan sun tarwatsa ko’ina muka gudu. Mahaifiyata ta ja ni gida.”
A halin da ake ciki, kotun da ke karkashin jagorancin Mai shari’a Hamidu Kunaza ta dage ci gaba da sauraren karar har zuwa ranar Litinin.
