Featured
Gwamnatin Kano za ta shirya taro kan farfado da fannin ilimi a jihar
Gwamnatin jihar Kano da tallafin ofishin raya kasahe rainon Ingila dake Najeriya da hadin gwiwa da kungiyar dattawan Arewa zasu shirya taron farfado da fannin ilimi a ranar 10 da 11 ga watan Yuli na wannan shekarar.
Bayanin hakan na dauke ne cikin wata sanarwa mai dauke da sa hannun mai baiwa Gwamnan Kano shawara a fannin ilimi, Alhaji Tajudeen Gambo wacce aka rabawa manema labarai.
Taron wanda aka yiwa take da “Sake inganta ilimi a Kano: ta hanyar amfani da nagartacciyar janya” zai mayar da hankali kan magance manyan matsalolin da ake fuskanta a fanni ilimi a jihar.
Acewar sanarwar, taron zai fito da hanyar magance kalubalen da ake fuskanta wajen samar da ilimi mai inganci da kuma fito da hanyar hadin gwiwa don bunkasa fannin ilimi a jihar.
Hakan na zuwa ne makwanni bayan gwamnatin jihar ta ayyana dokar ta baci a fannin na ilimi.
