Featured
Malaman Jinya Da Ungozoma Sun Janye Yajin Aikin Da Suke Yi – Ministan Lafiya
Kungiyar Ma’aikatan Jinya da Ungozoma (National Association of Nigerian Nurses and Midwives – NANNM) ta dakatar da yajin aikin gargadi da ta fara, kamar yadda Ministan Lafiya da Jin Dadin Jama’a, Farfesa Ali Pate, ya bayyana a yau Juma’a 01 ga Agusta, 2025.
Ministan ya shaida wa manema labarai jin kadan bayan wata ganawar sirri da aka gudanar a Abuja cewa an cimma matsaya tsakanin gwamnatin tarayya da shugabannin ƙungiyar.
Sai dai, shugabannin ƙungiyar sun ƙi magana da ‘yan jarida bayan kammala taron.
Idan za a tuna, Maaikatan Jinyar sun fara yajin aiki a fadin ƙasa tun ranar 29 ga Yuli bisa ga korafe-korafe da suka shafi rashin kulawa daga gwamnati, ciki har da rashin inganta jin dadin aiki, rashin adalci wajen biyan alawus, da kuma matsalolin da suka shafi yanayin aiki a cibiyoyin lafiya na gwamnatin tarayya.
A baya dai sun tsara yajin aikin ne ya kai har zuwa ranar 5 ga Agusta.
