Featured
NDLEA Ta Kama Kwayoyin Tramadol Miliyan 1.6 Da Ake Shirin Shiga Da Su Kano
Hukumar Yaƙi da Sha da Fataucin Miyagun Ƙwayoyi ta Ƙasa (NDLEA) ta kama ƙwayoyin tramadol miliyan 1.63 da aka ɓoye a cikin wasu manyan motocin dakon kaya da ke kan hanyarsu ta zuwa Kano. Hukumar ta ce bincike ya gano cewa motocin na da alaƙa da wata ƙungiyar fataucin miyagun ƙwayoyi da ke aiki tsakanin Togo, Jamhuriyar Benin da Najeriya.
NDLEA ta ce an kama direbobin motocin biyu masu shekaru 22, Jabir Kabiru da Muhammed Nuhu, bayan da aka gano ƙwayoyin a ɓoyayyun sassan motocin. Hukumar ta kuma bayyana cewa bincike ya nuna dukkan motocin da aka kama a ranakun 21 ga Yuni, 2 da 4 ga Yuli na ƙungiya ɗaya ne.
Read Also : An Daƙile Harin ISWAP a Wani Sansanin Soji Da Ke Borno
Baya ga hakan, hukumar ta kama wasu da ake zargi da safarar miyagun ƙwayoyi a jihohin Lagos, Rivers da Edo, ciki har da wata ‘yar kasuwa da ake zargin ta shigo da tabar wiwi ta roba daga Canada da kuma wani mutum mai shekara 80. Shugaban NDLEA, Birgediya Janar Mohamed Buba Marwa (mai ritaya), ya yabawa jami’an hukumar tare da buƙatar su ci gaba da ƙaimi wajen yaƙi da fataucin miyagun ƙwayoyi.
