Featured
Shari’ar Musulunci Ba Barazana Bace Ga Kiristoci – Ɗanmalikin Bauchi
Aminu Danmaliki, wani babban basarake a Bauchi kuma mai rike da sarautar Danmalikin Bauchi, ya ce zargin cewa Shari’a barazana ce ga Kiristoci ko Kiristanci “tunani ne na rashin sani da kuskuren fahimta.” Yayin da yake ganawa da manema labarai a Lahadi, ya jaddada cewa tsarin Shari’a bai da ikon hukunta wadanda ba Musulmi ba, kuma doka ce ta Musulmai kawai a jihohin Arewa.
Danmaliki ya kalubalanci wani rukunin masu fafutukar kare Kirista da suka kai koke zuwa gaban majalisar dokokin Amurka, yana cewa kokarinsu na sukar Shari’a “ba ya da tushe,” kuma manufarsa siyasa ce mai cike da tsoro da yaudara. Ya kuma ce akwai bayanai masu tarihi da ke nuna cewa dokokin Yammacin Turai, musamman a Ingila, sun aro wasu ginshikan Shari’ar Musulunci tun zamanin da. Ya yi nuni da nazarin John Makdisi da kuma shari’ar U.S. v. Addams ta 1894 domin nuna matsayin da aka taba bai wa Shari’a a Amurka.
A bangare na gida kuwa, ya ce Shari’ar Musulunci tana taka muhimmiyar rawa wajen tabbatar da adalci ga Musulmai, ba tare da ta taba haƙƙin Kiristoci ba. Ya kara da cewa, “da dama daga cikin Kiristoci na zuwa kotunan Shari’a da kansu” saboda saurin shari’a da tsaftar tsarin. Ya kuma jaddada cewa tsarin Shari’a yana karfafa hadin kan kasa, ba akasin haka ba.
Basaraken ya kammala da cewa Nigeria na tafiya ne da tsarin dokoki uku — common law, customary law, da Shari’a — kuma kowannensu na aiki ga al’ummomin da suka yarda da shi. A cewarsa, Shari’a ta daɗe tana jagorantar adalci, kare rayuka da dukiyoyi, tabbatar da gaskiya a cinikayya, da tsare-tsaren shugabanci masu inganci. “Waɗannan dabi’u ne da suka gina al’ummomi tun fil azal,” in ji shi.
