Featured
EFCC Ta Kama Wasu Mutane Da Kuɗi FAM £53,000 a Filin Jirgin Sama na Lagos
Hukumar Yaki da Cin Hanci da Rashawa ta EFCC ta fara bincike kan wasu matafiya biyu da aka kama da kuɗaɗen waje ba tare da sun bayyana su ba, a Filin Jirgin Sama na Murtala Muhammed, Terminal 2, Lagos. Matafiyan, Mamud Nasidi da Yahaya Nasidi, sun kasance da kuɗaɗen $6,180 da £53,415 lokacin da jami’an Hukumar Filayen Jiragen Sama ta Kasa (FAAN) suka tsare su yayin binciken tsaro na yau da kullum.
Rahotanni sun nuna cewa mutanen biyu sun iso Najeriya daga birnin Dubai ta Addis Ababa kuma suna kan hanyarsu ta zuwa Abuja. Sun bayyana cewa jami’an tsaro ne da ke tafiya da wani mutum da kuma kuɗin a matsayin shaida, amma hukumomin suka tabbatar da cewa ba su bayyana adadin kuɗin ga hukumomin filin jirgin sama ba kamar yadda doka ta tanada.
Bayan kama su, an mika su da farko ga Hukumar Tsaro ta Kasa (DSS), daga bisani kuma aka mika su ga EFCC domin ci gaba da bincike da kuma yiwuwar gurfanar da su a gaban kotu. Haka kuma, EFCC ta tabbatar da kwace wayoyi uku daga hannunsu lokacin da aka kama su.
Hukumar ta ce an karɓi waɗanda ake zargi da kuma kayan da aka kwace daga hannunsu ta hannun CSE Margaret Lamai, wacce ta karɓe su a madadin Mukaddashin Darakta na EFCC a Lagos, Ahmed Ghali. Bincike yana ci gaba domin gano cikakken bayanin yadda kuɗaɗen suka shiga ƙasar ba tare da izini ba.
