Featured
Rundunar Ƴansanda a Kano Ta Tsaurara Tsaro Gabanin Bikin Kirsimeti da Sabuwar Shekara
Rundunar ’yan sandan Jihar Kano ta ƙara tsaurara matakan tsaro domin kare rayuka da dukiyoyin al’umma gabanin bukukuwan Kirsimeti da Sabuwar Shekara. Wannan sanarwa ta fito ne a ranar Litinin, 22 ga Disamba, 2025, da misalin ƙarfe 4:34 na yamma, daga Kwamishinan ’Yan Sanda na jihar, Ibrahim Adamu Bakori.
Kwamishinan ya bayyana hakan ne yayin wani taro da ya yi da manyan jami’an rundunar, ciki har da kwamandojin sassa, yankuna da kuma na dabarun yaƙi, domin kammala shirye-shiryen tsaro na lokacin bukukuwa. Ya ce an ɗauki matakan ne bisa umarnin Sufeto Janar na ’Yan Sanda, Kayode Egbetokun, na tabbatar da zaman lafiya a faɗin ƙasar.
Bakori ya ce dabarun tsaron sun haɗa da ƙara sintiri ba dare ba rana, bayyanar ’yan sanda a wurare masu muhimmanci, tattara bayanan sirri da kuma haɗin gwiwa da sauran hukumomin tsaro. Rahoton da Kakaki24 ke bibiyowa ya nuna cewa an tura jami’ai zuwa masallatai, coci-coci, wuraren shakatawa, manyan hanyoyi da unguwanni.
Ya kuma gargaɗi jama’a cewa rundunar ba za ta lamunci duk wani abu da zai iya tayar da hankalin jama’a ba, tare da jaddada haramcin hawan doki ba bisa ƙa’ida ba da kuma amfani da wutar wasa. Rundunar ta buƙaci al’umma su kasance masu sa ido, su guji tuƙi cikin ganganci, tare da sanar da ’yan sanda duk wani abu da ake zargi ta lambobin gaggawa.
