Featured
EFCC Ta Bankado Kadarori 41 Masu Darajar Naira Biliyan 212 da Aka Dangantasu da Malami
Hukumar Yaki da Cin Hanci da Rashawa ta Ƙasa (EFCC) ta bayyana cewa ta gano kadarori har guda 41 da ake dangantawa da Abubakar Malami, tsohon Babban Lauyan Ƙasa kuma Ministan Shari’a, a wani sabon bincike da ya janyo hankalin jama’a. Rahoton ya fito ne a ranar Laraba, 24 ga Disamba, 2025, yana nuna girman kadarorin da ake zargin suna da alaƙa da tsohon ministan.
Rahotanni daga TheCable sun nuna cewa kadarorin sun haɗa da otal-otal, gidajen zama, filaye, makarantu, da kuma kamfanin buga littattafai (printing press), inda aka ce sun bazu a jihohin Kebbi, Kano da Babban Birnin Tarayya (FCT), Abuja. EFCC ta ce wannan bincike na daga cikin ƙoƙarinta na bin sawun dukiya da ake zargin an mallake ta ta hanyoyin da ba su dace ba.
Binciken da Kakaki24 ke bi ya nuna cewa mafi yawan kadarorin na cikin jihar Kebbi, inda aka kiyasta darajarsu da Naira Biliyan 162,195,950,000, yayin da kadarorin da ke jihar Kano ke da darajar kusan Naira Biliyan 16,011,800,000. Wannan ya kara nuna yadda binciken ke shafar jihohi da dama a arewacin ƙasar.
A Babban Birnin Tarayya (FCT) Abuja kuwa, rahoton ya ce darajar kadarorin da aka gano ta kai kusan Naira Biliyan 34,685,000,000, lamarin da ya kai jimillar darajar dukkan kadarorin zuwa Naira Biliyan 212. EFCC ta ce binciken na ci gaba da gudana, tare da alƙawarin ɗaukar matakan doka kamar yadda kundin tsarin mulki ya tanada.
