Featured
Sojoji Sun Ceto Mutane 47 Daga Hannun Mayaƙan ISWAP a Borno
Rundunar sojin Najeriya ta bayyana cewa dakarunta na Operation Hadin Kai sun ceto mutum 47, mafi yawansu mata da ƙananan yara, daga hannun mayaƙan ISWAP a yankin Kangarwa da ke ƙaramar hukumar Kukawa a jihar Borno.
A cewar rundunar, an samu nasarar ceton mutanen ne a ranar 20 ga Yunin 2026 bayan wani gagarumin samame da sojoji suka kai, wanda ya tilasta wa ‘yan ta’addar tserewa tare da barin waɗanda suka tsare.
Sanarwar ta ce hare-haren ƙasa da na sama da aka kai wa sansanonin ISWAP a yankin Tafkin Chadi ne suka haddasa rikicewar ‘yan ta’addar. An kai waɗanda aka ceto wuraren tsaro domin kula da lafiyarsu da ba su taimakon jin kai, yayin da rundunar ta jaddada aniyarta ta kawo ƙarshen ta’addanci a Arewa maso Gabas.
