Featured
Atiku Ya Sanya El-Rufai a Kwamitin Yaƙin Neman Zaɓensa
Ɗan takarar shugaban ƙasa na jam’iyyar ADC, tsohon mataimakin shugaban ƙasa Atiku Abubakar, ya naɗa tsohon gwamnan Kaduna, Malam Nasir El-Rufai, a matsayin mataimakin shugaban Kwamitin Yaƙin Neman Zaɓensa.
Atiku ya sanar da naɗin ne a wata sanarwa da mai magana da yawunsa, Phrank Shaibu, ya fitar ranar Alhamis. Sanarwar ta ce Kashim Ibrahim-Imam ne zai jagoranci kwamitin, yayin da El-Rufai zai taimaka wajen daidaita harkokin siyasa da hulɗa da masu ruwa da tsaki a faɗin ƙasar.
Sanarwar ta kuma ce Sanata Austin Akobundu ne zai jagoranci ayyukan yau da kullum na yaƙin neman zaɓen a matsayin Darakta-Janar kuma Manajan Yaƙin Neman Zaɓe. An tsara kwamitin ne zuwa manyan sassa shida, waɗanda mataimakan Darakta-Janar za su jagoranta, tare da daraktoci 30.
A cikin tsarin kwamitin, Dele Momodu zai jagoranci sashen yaɗa labarai da sadarwa, yayin da Dino Melaye zai taka rawa wajen wayar da kan jama’a da yaɗa manufofin kamfen. Sanarwar ta ce an tsara tsarin ne domin rage cunkoso, fayyace nauyin kowa da kuma ƙara ɗora alhakin gudanar da ayyuka kan waɗanda aka naɗa.
