Addini
Rasuwar Dakta Ahmad Bamba babban rashi ne ga duniyar Ilimin Hadith – Atiku Abubakar

Tsohon mataimakin Shugaban Najeriya Atiku Abubakar ya miƙa ta’aziyyar rasuwar babban malamin addinin nan na Kano Sheikh Ahmad Muhammad Ibrahim Bamba, wanda aka fi sani da Kala Haddasana wanda ya rasu a jiya Juma’a.
Atiku wanda ya wallafa sakon ta’aziyyar a shafinsa na Facebook a ranar Juma’a ya ce ya yi matuƙar kaduwa lokacin da ya samu labarin rasuwar Dr. Ahmad ɗin.
“Na kaɗu matuƙa da samun labarin rasuwar Shaikh Ahmad Ibrahim Bamba”.
Atiku Abubakar ya ce rasuwar Shehin Malamin ta bar babban giɓi a duniyar ilimin hadisi wanda zai yi wahalar cikewa.
“Mutuwar sa babban rashi ne ga duniyar Ilimin Hadith da sauran rassan Ilman Musulunci. Ya sadaukar da dukkan rayuwarsa wajen ilmantarwa da wayar da kan mutane. Haƙiƙa an saurari karatuttukansa a dukkan sassan duniya”.
A ƙarshe Atiku Abubakar ya yi addu’ar Allah ya ji ƙan sa sannan ya bai wa iyalai da abokansa haƙurin rashinsa. “Addu’ar Allah Ya gafarta masa zunubansa, Ya haɗa shi da salihan bayi, Ya kuma ba shi Aljannatul Firdaus. Ameen”.
Sheikh Dr Ahmad ya rasu ne bayan gajeriyar rashin lafiya inda ya kwana ɗaya a Asibitin Koyarwa na Malam Aminu Kano.