Labarai
Bayan cafke Ahmed Idris, Gwamnatin tarayya ta naɗa Akanta Janar na riƙo

Gwamnatin tarayya, ta naɗa Mista Anamekwe Chukwunyere Nwabuoku a matsayin wanda zai ci gaba da kula da ofishin Akanta Janar na tarayya bisa binciken da hukumar EFCC ke yi a kan dakataccen Akanta Janar Ahmed Idris
Wannan dai na ƙunshe ne cikin wata takarda mai ɗauke da sa hannun Aliyu Ahmed, Babban Sakataren ma’aikatar Kuɗi, Kasafin da Tsare-tsare ta na Najeriya.
Sanarwar mai ɗauke da kwanan watan 20 ga wannan watan da muke ciki na Mayu, ta yi fatan Mista Anamekwe zai gudanar da aikinsa bisa gaskiya da amana da kuma bin dokoki da kuma kwarewa.
A makon jiya ne dai hukumar yaƙi da cin hanci da rashawa ta EFCC ta cafke Ahmed Idris bisa zarginsa da almundahanar kuɗi har naira biliyan 80.
Haka kuma, bayan cafke shi ɗin ne gwamnatin tarayya ta sanar da dakatar da shi daga muƙaminsa.