Labarai
Bayan Ta Sha Sukar Mutane, Aisha Buhari Ta Janye Karar Da Take Yiwa Aminu

Uwargidan shugaban kasa, Aisha Buhari, ta koka kan matsin lamba da kuma tofin Allah tsine da ka yi mata, inda ta janye karar da ake yi wa dalibin da ya ke shirin kammala karatu a jami’ar tarayya dake Dutse, Aminu Mohammed.
Da yake janye karar da ake tuhumar wanda ake tuhuma a ranar Juma’a, lauyan masu shigar da kara, Fidelis Ogbobe, ya ce uwargidan shugaban kasa a matsayinta na uwa ta yanke shawarar janye karar, biyo bayan tsoma bakin ‘yan Najeriya masu kishin kasa.
Ya dogara da Sashe na 108 karamin sashe na 2 (a) na Dokar Gudanar da Shari’a na Laifuka don bukatar janye karar.
Da yake yanke hukunci kan lamarin, Mai shari’a Yusuf Halilu na babbar kotun tarayya da ke birnin tarayya Abuja ya yabawa Misis Aisha Buhari bisa yadda ta dauki matakai na yafewa wanda ake tuhuma.
Yayin da yake bayar da sammacin sakin dalibin, alkalin ya yi kira ga iyaye da su rika sanya ido a kan ‘ya’yansu domin kaucewa faruwar irin hakan.
Mista Muhammed wanda ya fuskanci azabtarwa da kuma cin zarafi da suka hada da duka, ya fuskanci tuhume-tuhume na bata sunan uwargidan shugaban kasar Najeriya a wani sako da ya wallafa a shafinsa na Twitter.
A cewar wani rahoton ‘yan sanda, an kama Mista Muhammed ne a Jami’ar Tarayya Dutse a ranar 18 ga watan Nuwambar 2022 bayan Misis Aisha Buhari ta umurci tawagar ‘yan sanda da su bi diddigin sa.
Sannan an tsare shi a wani wuri da ba a sani ba, aka hana shi ganawa da danginsa da lauyansa, wanda hakan ya saba wa dokokin kare hakkin bil’adama na duniya.