Labarai
Bauchi: APC Ta Janye Dakatarwar Da Ta Yi Wa Tsohon Gwamnan Jihar

Jam’iyyar APC reshen jihar Bauchi ta bayyana janye dakatar da tsohon gwamnan jihar Mohammed Abdullahi Abubakar (SAN) daga jam’iyyar da aka yi ba bisa ka’ida ba.
Jam’iyyar ta bayyana hakan ne a wata sanarwa dauke da sa hannun sakataren yada labaranta, Adamu Aliyu Jalah ranar Juma’ar nan a Bauchi.
Sanarwar ta kara da cewa, “Wannan hukunci da ake zargin yana kunshe ne a cikin wasikar dakatarwar mai kwanan wata 14 ga watan Disambar 2022 an soke shi kuma kwamitin ayyuka na jam’iyyar APC na jihar Bauchi ya kebe domin neman sauraren korafi da kuma rashin bin ka’idojin ladabtarwa kamar yadda doka ta 21 ta tanada na Kundin tsarin mulkin jam’iyyar APC 2022.”
Shugabannin jam’iyyar APC na Unguwar Makama Sarkin Baki sun dakatar da Abubakar ne saboda amincewa da takarar Gwamnan jihar Bauchi a karkashin jam’iyyar PDP a karo na biyu, Bala Mohammed, a yayin wani liyafar cin abincin dare da gwamnatin jihar ta shirya domin karrama shi saboda ya samu mukamin Babban Lauyan Najeriya (SAN).
Sanarwar ta ci gaba da cewa, “Ku lura cewa Mohammed Abdullahi Abubakar (SAN) har yanzu dan jam’iyyar APC ne mai fafutuka kuma zai ci gaba da gudanar da ayyukan jam’iyyar na halal a dukkan matakai har sai an sanar da mataki na gaba.