Labarai
Ya zama wajibi jami’an tsaro su dage sosai- Tinubu

Shugaban ƙasa Bola Ahmed Tinubu, ya ce, ya zama dole ga jami’an tsaro su matsa ƙaimi a ayyukan su na bada kariya matuƙar ana so a ciyar da Najeriya gaba.
Shugaban ya furta hakan ne yayin ganawarsa ta farko da shugabannin hukumomin tsaro a fadar mulki ta Villa da ke birnin tarayya Abuja.
A ganawarsa da manema labarai bayan kammala ganawar tasu, mai bai wa shugaban shawara a kan harkokin tsaro Babagana Monguno, ya ce, shugaban ya shaida wa jami’an cewa, ba zai lamunci yanayin koma baya ba su fannin tsaro.
Jaridar Solacebase ta rawaito cewa, Shugaba Tinubu, ya kuma ce, dole a samu haɗin kai tsakanin dukkan ɓangarorin tsaro domin ganin an kawar da duk wata matsalar tsaron da ke addabar Najeriya.