Featured
Gombe: An Kama Matashi Kan Zargin Yin Luwadi Da Yaro Ɗan Shekara 4

Wasu mafarauta sun kama wani matashi da ake zargi da aikata luwadi da wani ƙaramin yaro ɗan shekara huɗu a Ƙaramar Hukumar Balanga ta Jihar Gombe.
Bayanai sun ce wasu ƙwararrun mafarauta ne suka cafke mutumin da ake zargi.
Kakakin rundunar ’yan sandan Jihar Gombe ASP Mahid Mu’azu Abubakar ne ya tabbatar da hakan cikin wata sanarwa da ya fitar a ranar Litinin.
Ya bayyana cewa mafarautan sun kama wanda ake zargin ne a lokacin da jama’a ke ƙoƙarin ɗaukar doka a hannun su, bayan kama shi da aka yi dumu-dumu yana luwaɗi da yaron.
Mahid, ya ce da misalin karfe 8 na dare ne aka kama wanda ake zargin, wanda kuma aka mika wa jami’an ’yan sanda domin daukar matakin da ya dace.
Kakakin ’yan sandan ya ce an kuma garzaya da yaron asibitin domin duba lafiyarsa, a yayin da ’yan sanda ke ci gaba da gudanar da binciki domin gurfanar da wanda ake zargin a gaban kotu.