Featured
Tinubu Ya Taya Gwamnan Kano Murnar Cika Shekara 63
Shugaban ƙasa Bola Ahmed Tinubu ya taya gwamnan Jihar Kano, Abba Kabir Yusuf, murnar cika shekara 63 da haihuwa, inda ya yaba masa da gaskiya, tawali’u da jajircewa wajen hidimar jama’a. Tinubu ya aike da sakon ne ta wata sanarwa da mai ba shi shawara kan yaɗa labarai, Bayo Onanuga, ya sanya wa hannu a ranar Lahadi, 5 ga Janairu, 2026. Ya bayyana Yusuf a matsayin shugaba mai hangen nesa.
Sakon murnar ya zo ne a daidai lokacin da ake ta ce-ce-ku-ce kan shirin gwamnan na sauya sheka daga NNPP zuwa APC, wanda aka dage daga 5 zuwa 12 ga Janairu. Tinubu ya yabawa ayyukan raya birane da gina hanyoyi da gadoji da Yusuf ke aiwatarwa, ciki har da tituna masu tsawon kilomita biyar a kowace ƙaramar hukuma. Ya kuma ce ayyana dokar ta-ɓaci a ilimi ta inganta sakamakon ɗaliban Kano a jarabawar NECO.
Ƴan majalisar dokokin Kano da dama na NNPP sun goyi bayan shirin sauya shekar gwamnan, duk da adawar Rabiu Musa Kwankwaso da shugaban NNPP na jihar, Hashimu Dungurawa. APC a Kano ta ce a shirye take ta karɓi Yusuf hannu bibbiyu idan ya shigo jam’iyyar. Yusuf dai shi ne kaɗai gwamna mai ci a NNPP a halin yanzu, kuma matakin nasa na iya sauya taswirar siyasar Kano gabanin zaɓen 2027.
