Labarai
Rundunar Yan Sanda Ta Musanta Rade-radin Dasa Bama-bamai A Birnin Tarayya Abuja

Rundunar ‘yan sandan Kasar nan ta karyata rade-radin cewa an binne bama-bamai a fadin Abuja.
Jami’in hulda da jama’a na rundunar, Muyiwa Adejobi ya fitar da sanarwa a ranar Asabar din nan.
Kakakin ya yi nuni da cewa, abin takaici ne yadda wasu ke yada bayanan karya bayan sanarwar ta’addancin da Amurka da Birtaniya da sauransu suka yi.
Adejobi ya ce daga cikin mutanen da ke wannan ikirari akwai wadanda ake zaton jakadun zaman lafiya ne da kuma masu kishin kasa na hadin kan kasa a Najeriya.
Ya ce yada jita-jita mai ban tsoro don kara haifar da firgici a babban birnin tarayya Abuja ba zai yi wa kasar alheri ba.
Adejobi ya dage cewa Abuja na da zaman lafiya kuma babu wata barazana da za ta zo, haka ma babban birnin tarayya ba ta da bama-bamai kamar yadda ake hasashe.
‘Yan sandan sun shawarci mazauna yankin da su yi watsi da wannan labarin na bogi wanda aka ce an dauki nauyinsa ne don haifar da tsoro a cikin mutanenmu da kuma zafafa harkokin siyasa.
“Za mu ci gaba da yin amfani da dukkan ingantattun dabarun aiki don lalata ayyuka masu zaman kansu da sauran masu aikata laifuka a kasar.”