Featured
Kakakin Majalisar Rivers Da Wasu Yan Majalisa 16 Sun Koma APC

Gagarumin rikici ya kunno kai a siyasar Jihar Rivers bayan da kakakin Majalisar Jiha, Martin Amaewhule, tare da wasu ‘yan majalisa 16 suka fice daga jam’iyyar PDP suka koma APC. An sanar da wannan mataki ne a yau Juma’a yayin zaman majalisar, lamarin da ya jefa siyasar jihar cikin sabon cece-kuce.
Amaewhule ya bayyana cewa akwai “rarrabuwar kai mai tsanani” a cikin jam’iyyar PDP wanda hakan ya tilasta musu komawa APC. Wannan sauyi dai na zuwa ne a lokacin da ake ta rikice-rikicen cikin gida a jam’iyyar PDP da kuma jayayya tsakanin manyan kusoshinta a jihar.
A yayin zaman majalisar, rahotanni sun nuna cewa matakin ya jawo ka-ce-na-ce a tsakanin al’umma da masu sharhi na siyasa, inda da dama ke ganin cewa wannan mataki na da nasaba da rikicin siyasar Rivers da yake kara ta’azzara. Kakaki24 ta tattara cewa guguwar siyasar jihar ta fara daukar sabon salo yayin da APC ke karɓar waɗannan wakilai.
Ana dai sa ran cewa karin bayani zai fito nan gaba, musamman yadda wannan canjin zai shafi ikon majalisar da tasirin siyasarta gaba ɗaya. Za mu ci gaba da kawo muku cikakkun rahotanni idan sun iso.