Featured
Kamfanonin Rarraba Wutar Lantarki Sun Yi Watsi da Shirin Gwamnatin Tarayya Na Rarraba Mitoci Kyauta
Kamfanonin rarraba wutar lantarki (DisCos) sun nuna shakku kan umarnin Ministan Wuta, Adebayo Adelabu, na cewa za a raba mitocin wuta kyauta ga dukkan masu amfani. Sun ce sanarwar ta yi kama da ta siyasa ne ba tare da yin shawarwari da masu ruwa da tsaki ba.
Gwamnatin Tarayya ta haramta karɓar kuɗi daga jama’a kan shigar da mitoci, tana mai cewa duk wanda aka kama yana karɓa zai fuskanci hukunci. Sai dai DisCos sun ce duk da kiran mitocin da “kyauta”, su ne za su biya kuɗinsu a hankali cikin shekaru goma, lamarin da ke sanya tambaya kan yadda za a dawo da kuɗin da aka kashe.
DisCos sun kuma yi gargaɗin cewa wannan sanarwa na iya lalata tsarin Meter Asset Providers (MAP), inda mutane ke sayen mitoci kai tsaye. Sun ce jama’a sun fara ƙin MAP saboda jin cewa mitoci kyauta ne, alhali mitocin ma basu wadata ga kowa ba, suna kira ga gwamnati da ta fayyace gaskiyar lamarin domin kauce wa rikici da cikas a bangaren wuta.
