Featured
Majalisa Na Shirin Matsar da Zaɓen Shugaban Ƙasa Zuwa Janairu 2027
Majalisar Tarayya na duba yiwuwar matsar da zaɓen shugaban ƙasa na 2027 zuwa ranar 16 ga Janairu, maimakon ranar 20 ga Fabrairu da aka sanar a baya, biyo bayan matsin lamba da suka shafi addini da kuma shawarwari tsakanin masu ruwa da tsaki.
Rahotanni sun nuna cewa an cimma matsaya tsakanin Hukumar Zaɓe Mai Zaman Kanta ta Ƙasa (INEC) da shugabannin Majalisar domin gabatar da zaɓen shugaban ƙasa a ranar 16 ga Janairu, yayin da zaɓen gwamnoni kuma zai gudana ranar 30 ga Janairu 2027. Sai dai har yanzu ana jiran amincewar majalisar gaba ɗaya kafin hakan ya zama doka.
Dalilin wannan sauyi shi ne yadda jadawalin farko ya faɗa cikin watan Ramadan, lamarin da ya janyo korafe-korafe daga musulmai da sauran masu ruwa da tsaki, waɗanda suka ce hakan na iya rage yawan fitowar masu kaɗa ƙuri’a.
A sakamakon haka, Majalisar Tarayya ta dakatar da zaman haɗa gyaran dokar zaɓe domin fara tattaunawa ta musamman kan sabon jadawalin, yayin da masana ke cewa wannan mataki na iya shafar shirye-shiryen jam’iyyu da kuma tsarin gudanar da zaɓen gaba ɗaya.
