Featured
Trump Ya Yi Barazanar Kai Hari Najeriya

Shugaban Amurka, Donald Trump, ya yi barazanar tura sojojin ƙasarsa zuwa Najeriya idan gwamnatin Shugaba Bola Tinubu ta gaza dakatar da abin da ya kira “kisan gillar Kiristoci.” A wani saƙo da ya wallafa a dandalin Truth Social, Trump ya umurci Ma’aikatar Yaƙi ta Amurka da ta fara shirin kai hari, tare da yin barazanar dakatar da duk wani tallafi ga Najeriya idan kashe-kashen bai tsaya ba. Ya ce Amurka za ta “fada da bindigogi a hannunta” domin kawar da “ta’addancin Musulmi” da yake ikirarin suna kashe Kiristoci a ƙasar.
Sai dai gwamnatin Najeriya ta mayar da martani cikin ladabi, inda Shugaba Tinubu ya bayyana kalaman Trump a matsayin “ƙarya da rashin fahimtar yanayin addini a Najeriya.” A cewarsa, Najeriya ƙasa ce mai cikakken ‘yancin addini, kuma gwamnati na kare kowa ba tare da nuna bambanci ba. Ma’aikatar Harkokin Waje ta tabbatar da cewa ana ci gaba da tattaunawa da gwamnatin Amurka don warware rashin jituwa kan wannan batu.
Mai ba shugaban ƙasa shawara kan dabarun watsa labarai, Bayo Onanuga, ya ce zargin kisan gillar Kiristoci “ƙarya ce kawai,” yana mai jaddada cewa hare-haren da ake samu a wasu yankuna ba na addini ba ne, domin Musulmi da Kiristoci ke rasa rayuka a lokuta daban-daban. Ya kuma roƙi Amurka ta taimaka da kayan yaki da horo maimakon yi wa Najeriya shari’a ta siyasa.
A ɓangare guda, wasu shugabannin addini sun yi kira da a kwantar da hankali. Bishop Matthew Hassan Kukah ya ce ya kamata ‘yan Najeriya su jira sakamakon tattaunawar diflomasiyya kafin yanke hukunci. Amma wani jagoran Kirista daga Plateau, Ezekiel Dachomo, ya bayyana matakin Trump a matsayin “nasara ga Kiristocin Najeriya,” yana mai cewa duniya ta fara gane halin da Kiristoci ke ciki a ƙasar. Duk da haka, masana harkokin diflomasiyya sun gargadi cewa wannan rikici na iya lalata dangantakar Najeriya da ƙasashen yamma da kuma jinkirta taimakon soji da tattalin arziki daga Amurka.